အခုတလော ဘလော့ဂါ မြန်မာစာ ရိုက်နည်းကျင့်နေတယ်။
လက်ကွက်ကို ကောင်းကောင်း မှတ်မိသွားပြီ။ စာရိုက်တော့ အရမ်း နှေးသေးတယ်။ လက်ကွက် စာရွက်ကြီး တကြည့်ကြည့် အဆင့်ကလွတ်သွားလို့ ကိုယ့်ကိုကိုယ် ဂုဏ်ယူတယ်။ ဒါပေမဲ့ ရေးရတာ အရသာမရှိသလိုပဲ၊ ကိုယ်ပြောချင်တာတွေက ဗမာလို ကောင်းကောင်းထွက်မလာဘူး၊ စာကြောင်း ကောင်းကောင်းစီလို့ မရဘူး။ ဘာပဲဖြစ်ဖြစ် ငါဗမာစာ ရိုက်တတ်သွားပီကွ လို့ပြောလို့ရသွားပြီ၊ သိပ်မျက်နှာငယ်စရာ မလိုတော့ဘူး။

အခုတလော ဘလော့ဂါ မြန်မာစာတွေ ပြန်ဖတ်နေတယ်။
ဘာရယ်လို့မဟုတ်ပါဘူး၊ စာတလုံး တတ်ထားတာ၊ မမေ့အောင်လို့။ ကိုယ်ဖတ်တဲ့ စာတလုံးရဲ့ အဓိပ္ပါယ်နဲ့ တန်ဖိုးကို နားလည်လာအောင်လို့၊ အရသာရှိရှိ ခံစားနိုင်အောင်လို့။ ဘယ်သူ့ အတွက်မှ မဟုတ်ဘူး၊ ကိုယ့်အတွက် ကိုယ်ပဲလုပ်နေတယ်။

အခုတလော ဘလော့ဂါ စာအုပ်ထူကြီး ၃အုပ်နဲ့ မျက်နှာအပ် အိပ်ဖြစ်နေတယ်။
မိုက်ခရိုဆော့ဖ် စာမေးပွဲ ဆက်ဖြေဖို့ စဉ်းစားထားတာ၊ တဆင့်တော့နီးသွားပြီ။ ဟိုး ချောင်ထဲက ဖုန်တလောလောနဲ့ စာအုပ်ကြီးတွေ ခုတင်ပေါ်ပြန်ရောက်နေလို့။ အိပ်ဆေးကောင်းကောင်းတစ်ခွက်လဲရသွားတယ်။ စာအုပ် ကိုင်လိုက်တာနဲ့ ခေါကနဲပဲ။

အခုတလော ဘလော့ဂါ အလုပ်တွေ အရမ်းရှုပ်နေတယ်။
project တော်တော်ကြီးကြီးတစ်ခုကို တာဝန်ယူထားရတယ်။ မလုပ်ဖူးသေးတဲ့ နည်းအသစ်တစ်ခုနဲ့ ဒီ project မှာစလုပ်ရတယ်။ နည်းသစ်ရဲ့ လုပ်ဆောင်ချက်နဲ့ အသုံးပြုပုံတွေကို အချိန်ယူပြီး လေ့လာနေရတော့ ပုံမှန် ထက်ပိုပြီး အချိန်လဲကြာ၊ ခေါင်းလဲ စားတယ်။ အဲလို project တွေလုပ်ရပြီဆိုရင် အလုပ်အကြောင်းကလွဲလို့ ခေါင်းထဲမှာ ဘာမှ မထားတော့ဘူး။ စားလဲ ဒီစိတ်၊ သွားလဲ ဒီစိတ်၊ အိပ်လဲ ဒီစိတ်၊ ညညယောင်လို့ ထအော်ရင်လဲ အလုပ်အကြောင်းပဲ အော်မိမှာပဲ။

အခုတလော ဘလော့ဂါ သူငယ်ချင်းတွေနဲ့ စကားသိပ်မပြောဖြစ်ဘူး။
သူတို့ပြောတာတွေပဲ နားထောင်မိနေတယ်။ ကိုယ်မှာ အလုပ်အကြောင်းကလွဲရင် ပြောစရာ စကားမရှိလို့။ လေစိမ်းတွေ တိုက်နေတာမဟုတ်ဘူး၊ လေငြိမ်နေတာ။

အခုတလော ဘလော့ဂါ စိတ်ရှုပ်နေတယ်။
ပွစိပွစိ ဘေးကလာပြောတဲ့လူတွေကို တခုတခုနဲ့ ကောက်ပေါက်ပစ်ချင်တယ်။ ဘာတွေပြောသွားမှန်း နားထဲကို မဝင်လိုက်ဘူး၊ တဂွီဂွီ တစီစီပဲ ကြားလိုက်တယ်။

အခုတလော ဘလော့ဂါ စိတ်ဓာတ်ကျနေတယ်။
လုပ်ချင်တာ၊ ဖြစ်ချင်တာ တွေများပြီး ဘာမှ အရာမယွင်း မဖြစ်မြောက်လို့ပဲ။

အခုတလော ဘလော့ဂါ စိတ်ပျက်နေတယ်။
ရည်မှန်းချက်တွေ၊ ရည်ရွယ်ချက်တွေ ကင်းမဲ့ နေတယ်။ ရေလိုက် ငါးလိုက် ပေါ့ပေါ့လေးပဲ နေချင်တယ်။ အဲလိုနေချင်တဲ့ စိတ်ကို ဘာလုပ်ရမှန်းမသိ စိတ်ကုန်နေတယ်။

အခုတလော ဘလော့ဂါ ဘာကိုမှန်းမသိ စိတ်ဆိုးနေတယ်။
ကိုယ့်အသုံးမကျမှုတွေကို ဒေါသထွက်နေတယ်။

အခုတလော ဘလော့ဂါ စိတ်ရောဂါအထူးကုဆေးရုံ ရောက်ဖို့ ပိုနီးနီးလာတယ်။
စိတ် စိတ် စိတ် စိတ် နဲ့ တစိတ်စိတ် မြည်နေတယ်။

အခုလဲ ဘလော့ဂါ ပေါက်တကရ ခေါင်းထဲပေါ်ရာ လျှောက်ရေးနေတယ်။
အား ခေါင်းထဲမှာ ဘာတွေမှန်းကို မသိဘူး။
လောလောဆယ်တော့ ဘလော့ဂါ အိပ်ချိန်ရောက်သွားပြီ။

Related Posts: